Sumqayıtda qonşusunu qətlə yetirməkdə təqsirli bilinən şəxsə hökm oxunub. Sumqayıt24 bu barədə 29 dekabr tarixində Oxu.az-a istinadən xəbər verir.
Əvvəllər məhkum olunmuş Kamil Məmmədov aralarında yaranan mübahisə zamanı qonşusu Rasim Əliyevi bıçaqlayaraq qətlə yetirib. O, həmin gün polis əməkdaşları tərəfindən saxlanılıb.
İttihama əsasən, müəyyən olunub ki, hadisə baş verən gün K. Məmmədov Sumqayıtda, sürücülük məktəbinin yaxınlığındakı kafedə 200 qram araq və 5 bakal pivə içəndən sonra, təxminən saat 21:00 radələrində taksiyə minərək yaşadığı Kimyaçılar qəsəbəsinə yollanıb.
Evinin qarşısında səyyar meyvə-tərəvəz alqı-satqısı ilə məşğul olan qonşusu Rasim Əliyevlə rastlaşıb, ondan qarpızın olub-olmadığını soruşub. Sonuncu Kamilin bərk sərxoş olduğunu görüb və söylədiyini qeyri-ciddi qəbul etməklə acıqlı tərzdə: “Mən qarpız satıram bəyəm?”, - deyə cavab verib. Bu söz Məmmədova pis təsir etdiyindən o, taksidən düşüb və Əliyevə yaxınlaşaraq kobud və narazı formada danışmasının səbəbini soruşduqda qonşusu nalayiq ifadələr işlədib və əl-qol ataraq onun əynindəki köynəyi dartıb cırıb. Kənar şəxslərin yanında Rasimin hərəkətlərini özünə qarşı təhqir kimi qəbul edən Kamil öz evinə gedib, mətbəxdən bıçaq götürüb, geri qayıdıb və Əliyevə bir neçə zərbə endirib. Ətrafda olan adamlar mane olaraq ona növbəti zərbələri endirməyə imkan verməyiblər. Ağır yaralanan R. Əliyev xəstəxanaya aparılarkən yolda dünyasını dəyişib.
İstintaqın sonunda K. Məmmədovun əməli Cinayət Məcəlləsinin “xuliqanlıq niyyəti ilə qəsdən adam öldürmə” maddəsinə tövsif edilib. Məhkəmə prosesində o, ittiham üzrə özünü qismən təqsirli hesab edib.
Məhkəmə araşdırılan sübutlara qiymət verərək Məmmədovun əməlində cinayət tərkibinin olmasını və bununla da onun təqsirliliyini tam sübuta yetirilmiş hesab edib. Yekunda təqsirləndirilən şəxs məhkəmənin hökmü ilə cəzasını ciddi rejimli cəzaçəkmə müəssisəsində çəkməklə 16 il müddətinə azadlıqdan məhrum edilib.
