Sumqayıt sakininə məxsus avtomobilin dövlət qeydiyyat nişanı oğurlanıb. Sumqayıt24 bu haqda 20 dekabr tarixində Qafqazinfo.az-a istinadən xəbər verir.
S. Baxşəliyev rəsmi sənədlər olsa da, nömrəsini bərpa edə bilmir: “Hadisə dekabrın 3-ü baş verib. 4 dekabr saat 09:45 də yaşadığım Sumqayıt şəhəri, 18-ci mikrorayon, 7 saylı binanın qarşısına - həyətə düşdüm, gördüm maşının arxa nömrəsi (10-LK-777 dövlət qeydiyyat nişanı - red.) yoxdur. “102” xidmətinə məlumat verəndən sonra məni 1-ci polis bölməsinə dəvət edib ərizəmi aldılar. Nömrə mənim öz adımadır. Lakin dəfələrlə müvafiq qurumlara müraciət etsəm də, nə nömrə tapılır, nə də nömrəmi bərpa edirlər”.
Baş Dövlət Yol Polisi İdarəsinin İctimai qurumlarla əlaqə şöbəsinin baş inspektoru kapitan Toğrul Nəsirli məsələyə aydınlıq gətirib. O, itkin və ya oğurlanmış nömrə tapılmadığı təqdirdə onun bərpa edilmədiyini bildirib: “Yol Hərəkəti Haqqında Qanun”un 29-cu maddəsinə əsasən, dövlət qeydiyyat nişanı itdikdə və ya oğurlandıqda nəqliyyat vasitəsinin sahibi və ya sərəncam vermək hüququ olan digər şəxs yeni dövlət qeydiyyat nişanının alınması üçün müvafiq icra hakimiyyəti orqanına müraciət edir. Nişan tapıldıqda ilk olaraq onun sonuncu sahibinə və ya sərəncam vermək hüququ olan digər şəxsə təklif edilir”.
Baş inspektor əlavə edib ki, nəqliyyat vasitəsinin dövlət qeydiyyat nişanları və ya onlardan biri olmadıqda, yaxud saxta və ya qeyri-standart olduqda, nəqliyyat vasitəsini başqa nəqliyyat vasitəsinə verilmiş dövlət qeydiyyat nişanı ilə idarə etdikdə, vətəndaşlar nəqliyyat vasitəsinin idarə olunmasından kənarlaşdırılır, 60 manat cərimə edilir və həmin xətalar 4 balla qiymətləndirilir.
Nəqliyyat üzrə ekspert Elməddin Muradlı qanunvericilikdə boşluğun olduğunu deyir: “Təəssüflər olsun ki, qanunvericilikdə nömrələrin dublikat olunması məsələsi öz əksini tapmayıb. “Yol Hərəkəti Haqqında Qanun” 1998-ci ildə qəbul olunub. O vaxt qanuna belə bir müddəa əlavə edilib ki, itirilmiş, oğurlanmış nömrə 1 ay ərzində tapıldıqda ilk növbədə sahibinə təqdim edilsin. Əgər sahibi istəməsə, nömrə başqasına verilə bilər. O dövrdən indiyədək qanunda hər hansı dəyişiklik edilməyib və insanlar da bundan əziyyət çəkirlər. Vətəndaşa məxsus 10 seriyası ilə başlayan nömrənin 10-20 min manat arası qiyməti var. Bu nömrəni kimsə fiziki olaraq əldə sata bilər, çünki DYP-də bu nömrə artıq yoxdur. Təklif edərdim ki, qanunvericilikdə bu məsələ nəzərə alınsın”.
