Sumqayıtda 20 yaşlı gənc tanışına xəsarət yetirib. Sumqayıt24 bu haqda 29 dekabr tarixində Demokrat.az-a istinadən xəbər verir.
Hadisə sentyabrın 20-də 10-cu mikrorayon ərazisində yerləşən “Bəyaz” şadlıq sarayının yaxınlığında baş verib. Osman və onun “Mercedes” markalı avtomobilində əyləşən Xumar (ad şərtidir) arasında mübahisə yaranıb. Nəticədə o, Xumarın üz nahiyəsinə yumruqla zərbə vurub.
Osman barəsində Cinayət Məcəlləsinin “qəsdən sağlamlığa xəsarət yetirmə” maddəsi ilə ittiham elan edilib.
İfadə verən gənc özünü təqsirli bilib. O bildirib ki, Xumar ilə bir müddət bir yerdə işləyib:
“Ailə qurmaq məqsədilə bir-birimizlə danışdıq. Lakin sonradan münasibətlərimiz pisləşdiyi üçün ayrılmalı olduq. Bu səbəbdən sentyabrın 20-də “Bəyaz” şadlıq sarayının yaxınlığında öz idarə etdiyim “Mercedes” markalı avtomobildə Xumarla söhbət etdik. Bu zaman Xumar məni əsəbiləşdirdi. Bu səbəbdən əlimin arxa hissəsi ilə onu vurdum”.
Cinayət işinə Sumqayıt şəhər Məhkəməsində baxılıb. Təqsirləndirilən şəxsin zərərçəkmiş şəxslə barışması, zərərçəkmiş şəxsin ondan şikayətçi olmaması nəzərə alınaraq cinayət təqibinə xitam verilib. Osman cinayət məsuliyyətindən azad olunub.
