Sumqayıtda qızıl alverçilərinə qarşı külli miqdarda dələduzluq edilib. Sumqayıt24 bu barədə 29 dekabr tarixində Lent.az-a istinadən xəbər verir.
Dələduzluqda təqsirləndirilən R.Əliyev şəhərdə yerləşən “Cavid” ticarət mərkəzində qızıl satan R.Əhmədovaya külli miqdarda ziyan vurub.
O, əvvəlcə qadın satıcının etibarını qazanmaq üçün ondan nisyə qızıl alıb və sataraq pulunu geri qaytarıb. Növbəti dəfədə R.Əliyev 45.539 manatlıq qızılı nisyə götürüb, lakin bu dəfə qızılların pulunu sahibinə qaytarmayıb.
O, qızıl alverçisi olan digər zərərçəkmiş G.Ağayevaya da eyni üsulla 34.960 manat ziyan vurub. Zərərçəkmişlər hüquq-mühafizə orqanlarına müraciət ediblər. Nəticədə R.Əliyev barəsində Cinayət Məcəlləsinin “dələduzluq təkrar törədildikdə” maddəsi ilə cinayət işi başlanıb.
Hazırda iş üzrə məhkəmə istintaqı davam edir.
