Ümummilli lider Heydər Əliyevin 16 avqust 2000-ci il tarixli Sərəncamına əsasən, avqustun 18-i Sərhəd Qoşunları əməkdaşlarının peşə bayramı günü kimi təsis edilmişdir. 2002-ci il iyulun 31-də ulu öndər Heydər Əliyev Dövlət Sərhəd Xidmətinin yaradılması barədə Fərman imzaladı. Sərhəd Qoşunları Gününün təsis edilməsi 18 avqust 1919-cu ildə Azərbaycan Xalq Cümhuriyyətinin parlamenti tərəfindən sərhədlərin mühafizəsi haqqında qanunun qəbul edilməsi ilə bağlıdır. Həmin zaman Azərbaycan Xalq Cümhuriyyəti Azərbaycan sərhədlərinin mühafizəsini təşkil etmişdir.
1991-ci ildə Azərbaycan Respublikasının Milli Şurası tərəfindən “Azərbaycan Respublikasının Dövlət Sərhədi haqqında” Qanun qəbul edildi. 16 dekabr 1991-ci ildə Azərbaycan Respublikasının Dövlət Sərhədini Mühafizə Komitəsi yaradıldı.
13 iyun 1992-ci ildə “Yalama” Əlahiddə Nəzarət Buraxılış Məntəqəsi fəaliyyətə başladı. Sumqayıtdan olan Elçin Quliyev isə 1992-ci ildə Xudat Əlahiddə Nəzarət Buraxılış Məntəqəsinin rəisi, 1996-2001-ci illərdə Xudat Sərhəd Dəstəsinin rəisi vəzifələrində çalışmışdır. Onun rəhbərliyi altında milli sərhəd qoşunlarımızın əsgərləri Azərbaycanla Rusiya arasındakı əsas tranzit yola nəzarət etmək üçün Samur qəsəbəsindəki körpü üzərinə çıxdılar. Nəticədə kiçik bir post sonradan Xudat Sərhəd Dəstəsinə çevrildi.
