Sumqayıt Tibb Mərkəzi (STM) şagirdləri sağlam həyat tərzi ilə bağlı maarifləndirib. Sumqayıt24 bu haqda 26 oktyabr tarixində xəbər verir.
Fəxrəddin Piriyev adına 18 nömrəli məktəbdə tədbir təşkil olunub. Yuxarı sinif şagirdlərinin qatıldığı tədbirdə STM-in direktor müavini Arzu Bəndəliyeva, məktəbin direktoru Leyla Abdullayeva, 2 nömrəli Ailə Sağlamlıq Mərkəzinin (ASM) baş həkim əvəzi Gülbar Haqverdiyeva, Sumqayıt Narkoloji Dispanserinin klinik psixoloqu Nihad Zərbəlizadə və məktəbin psixoloqu Raziyə Tağıyeva iştirak ediblər.
STM-in direktor müavini Arzu Bəndəliyeva bildirib ki, yeniyetmə və gənclər arasında sağlam həyat tərzinin təbliği çox aktual məsələdir. O, günə erkən başlamaq, normal səhər yeməyi, aktiv həyat tərzi, hər gün bol su içmək, idmanla məşğul olmaq, fastfud qidalardan uzaq durmağın sağlam həyat tərzinin əsas amilləri olduğunu diqqətə çatdırıb.
2 nömrəli ASM-in baş həkim əvəzi Gülbar Haqverdiyeva tədbir iştirakçılarına sağlam həyat tərzinin əsas komponentlərindən danışıb, yeniyetmə və gəncləri normalara riayət etməyə çağırıb.
Sumqayıt Narkoloji Dispanserinin klinik psixoloqu Nihad Zərbəlizadə narkomaniyanın gənclər və yeniyetmələr arasında daha çox yayılma təhlükəsindən, insan orqanizminə və psixologiyasına vurduğu zərərlərdən geniş bəhs edib. Həmçinin alkoqol, siqaret və narkotik maddələr kimi zərərli vərdişlərdən uzaq olmaq tövsiyə olunub.
Sonda məktəbliləri maraqlandıran suallar cavablandırılıb, təbliğedici broşürlər paylanılıb.
