Bu gün şəhid İlkin Məmmədzadənin doğum günüdür.
İlkin Əzizağa oğlu Məmmədzadə 19 dekabr 1991-ci ildə Sumqayıt şəhərində anadan olub. 1997-2008-ci illərdə Sumqayıt şəhərindəki 42 saylı məktəbdə təhsil alıb.
Məktəbi fərqlənmə ilə bitirən İlkin 2008-ci ildə Azərbaycan Dövlət Aqrar Universitetinin Balıqçılıq təsərrüfatı ixtisasına qəbul olub. Universitetdə oxuduğu müddətdə Gənclər Təşkilatına sədrlik edib. "Xəmsə" və "Breyn-rinq" yarışmalarında iştirak edib.
2012-ci ildə Universiteti Qırmızı Diplomla başa vurub. 2014-2016-cı illərdə Gəncə Dövlət Aqrar Universitetində magistr təhsili alıb. Hərbi xidmətdən sonra elmi fəaliyyətlə məşğul olub.
2012-2013-cü illərdə Naxçıvan Muxtar Respublikasının Sədərək rayonunda hərbi xidmətdə olub. 2016-cı ilin fevral ayından etibarən hərbi xidmətə başlayıb.
2016-cı ilin iyun ayından etibarən Goranboy rayonunun Yuxarı Ağcakənd kəndində "N" saylı hərbi hissədə leytenant kimi xidmətə başlayıb. Xidməti ərzində dəfələrlə fəxri fərman və təşəkkürnamələr alıb. 2018-ci ilin dekabr ayında Tərtər rayonundakı "N" saylı hərbi hissəyə köçürülüb.
Nümunəvi xidmətinə görə daima kollektiv içində seçilib. 2020-ci ilin iyun ayında baş leytenant rütbəsini alıb. Azərbaycan Ordusunun baş leytenantı olan İlkin Məmmədzadə Vətən müharibəsi zamanı döyüşlərdə 21 nəfərə yaxın yaralı hərbçini döyüş meydanından çıxarıb.
7 oktyabr 2020-ci ildə Tərtər-Ağdərə istiqamətində "Tülkü Dərəsi" adlanan ərazidə açıq döyüşdə hücum zamanı qəhrəmancasına şəhid olub.
Döyüş əməliyyatlarına qatılaraq şəxsi igidlik və şücaət nümayiş etdirdiyinə görə “Vətən uğrunda” medalı ilə təltif edilib. Sumqayıt Şəhidlər xiyabanında dəfn edilib.
