“Vətən Müharibəsi Qazilərinə və Şəhid Ailələrinə Dəstək” İB-nin sədri həbs edilib. Sumqayıt24 bu haqda 15 sentyabr tarixində Qafqazinfo.az-a istinadən xəbər verir.
Oqtay Mirəlizadə Cinayət Məcəlləsinin 178.2.4-cü (Dələduzluq) maddəsi ilə məsuliyyətə cəlb olunub.
Belə ki, vətəndaşlardan biri hüquq-mühafizə orqanlarına O. Mirəlizadənin onu aldadaraq külli miqdarda pulunu aldığını və geri qaytarmadığını bildirib.
Şikayətçinin sözlərinə görə, QHT rəhbəri onun övladını köçürmə yolu ilə DYP-də işə qəbul etdirəcəyinə vəd verib. Yüksəkvəzifəli tanışları vasitəsilə bu işi həll edəcəyinə söz verən Oqtay Mirəlizadə 2022-ci ilin mayında ondan Sumqayıtda yerləşən “Yaşar” restoranında 25 min manat alıb. Lakin vədinə əməl etməyib və aldığı pulu geri qaytarmayıb. O, pulu işi həll etməsi üçün tanışına verdiyini deyib.
Cinayət işinin materialları baxılması üçün Sumqayıt Şəhər Məhkəməsinə göndərilib. Məhkəmənin hökmü ilə O. Mirəlizadə 2 il müddətinə həbs olunub.
