Sumqayıt Tibb Mərkəzinə (STM) yeni cərrahlar gəliblər. Sumqayıt24 bu haqda 17 avqust tarixində xəbər verir.
Həkim-cərrahlar Əşrəf Qafarov və Fəqan Zalov tibb müəssisəsində fəaliyyətə başlayıblar.
Onlarla tanış olaq:
Əşrəf Qafarov 1960-cı ildə Ucar rayonunun Boyat kəndində anadan olub. Azərbaycan Tibb Universitetinin Müalicə işi fakültəsində təhsil alıb. Bakı şəhər Kliniki Tibb Mərkəzi Xəstəxanasında cərrahi xəstəliklər üzrə internatura keçib. Sonra Ucar rayonu Mərkəzi Xəstəxanasının Cərrahiyə şöbəsində həkim-cərrah kimi fəaliyyət göstərib.
Ardınca 7 il ərzində M.A. Topçubaşov adına Elmi Cərrahiyyə Mərkəzinin Endokrin cərrahiyyə şöbəsində elmi işçi-cərrah vəzifəsində çalışıb. 2019-cu ildən etibarən isə Yevlax rayon Mərkəzi Xəstəxanasının Cərrahiyyə şöbəsində həkim-cərrah vəzifəsini icra edib.
2023-cü il avqustun 15-dən STM-in 4 nömrəli Xəstəxanasında həkim-cərrah kimi fəaliyyətə başlayıb.
Mütəxəssis, ümumi cərrah Fəqan Zalov da Sumqayıt Tibb Mərkəzini seçib. O, 1990-cı ildə Ağcabədi rayonunda anadan olub. Azərbaycan Tibb Universitetinin Müalicə-profilaktika fakültəsini bitirib. Sonra Dövlət Sərhəd Xidmətinin hərbi hospitalında işləyib.
2014-2019-cu illərdə M.A. Topçubaşov adına Elmi Cərrahi Mərkəzdə Ümumi cərrahiyyə üzrə rezidentura təhsili alıb. 2017-2018-ci illərdə Türkiyənin Samsun şəhərində On Doqquz May Universitetinində 6 aylıq rotasiyada olub.
2019-2020-ci illərdə Ağcabədi Rayon Mərkəzi Xəstəxanasının Cərrahiyyə şöbəsində cərrah vəzifəsində işləyib. Ardınca Sumqayıtda özəl klinikaların birində ümumi cərrah kimi fəaliyyət göstərib. 2021-2023-cü illərdə Respublika Klinik Xəstəxanasında həkim-cərrah kimi çalışıb. Avqustun 3-dən isə 4 nömrəli Xəstəxanada cərrah vəzifəsində fəaliyyətə başlayıb.
