“AF Hotel Aquapark” istirahət mərkəzində heyvanların qəfəsdə, əlverişsiz şəraitdə saxlanması faktı təsdiqini tapıb. Sumqayıt24 bu haqda 14 iyul tarixində Oxu.az-a istinadən xəbər verir.
Bioloji Müxtəlifliyin Qorunması Xidmətinin rəisi Firuddin Əliyev bildirib ki, sözügedən Novxanı qəsəbəsində yerləşən obyektə Bioloji Müxtəlifliyin Qorunması və Dövlət Ekoloji Təhlükəsizlik Xidmətlərinin əməkdaşları baxış keçiriblər. Bu zaman obyektin ərazisində heyvanların əlverişsiz şəraitdə saxlanıldığı məlum olub:
“Araşdırma zamanı heyvanların saxlanılması üçün “AF Hotel Aquapark” istirahət mərkəzinin zooloji kolleksiya şəhadətnaməsinin olmadığı müəyyən edilib”.
Xidmət rəisinin sözlərinə görə, müvafiq şəhadətnamənin olmadığı və heyvanların qanunsuz saxlanıldığı üçün obyektin sahibi Sevinc Rəşidova barəsində akt, protokol tərtib edilib və o, vəzifəli şəxs qismində 2000 manat cərimə olunub.
Bu gün heyvanlar baytar tərəfindən müayinə olunacaq, sonra isə Şamaxı Safari Parkına təhvil veriləcəklər.
