Sumqayıt Dövlət Universiteti (SDU) ASİİN-in (Mühəndislik, İnformatika,Təbiət elmləri və Riyaziyyat təhsil proqramları üzrə Akkreditasiya Agentliyi) ekspert qrupunu qəbul edib. Sumqayıt24 bu haqda 11 oktyabr tarixində xəbər verir.
Almaniya Federativ Respublikasının Düsseldorf şəhərində yerləşən ASİİN ilə SDU arasındakı müqaviləyə əsasən, universitetin Mühəndislik fakültəsi üzrə 3 təhsil proqramının beynəlxalq akkreditasiyadan keçirilməsi nəzərdə tutulub.
Ekspert qrupunun sədri, Çemnits universitetinin professoru Madhukar Çandra, üzvləri Hamburq Tətbiqi Elmlər Universitetinin professoru Volfqanq Rents, “Bosch” şirkətindən Dr. Alfred Şulte, ADA universitetinin tələbəsi İlhamə Novruzova, layihənin koordinatoru isə Paulina Petraçenkodur.
Rektor Rüfət Əzizov onları qəbul edərək universitetin gələcək fəaliyyəti, strateji hədəfləri, vizyonu, beynəlxalq akkreditasiyanın təhsil proqramlarının yenilənməsində önəmindən danışıb.
Sonra rektor qonaqlara hədiyyələr təqdim edib.
Günün ikinci yarısında Beynəlxalq ekspert qrupu ilə fasilələrlə SDU-nun Beynəlxalq əlaqələr üzrə prorektoru dosent Qafar Atayev, Beynəlxalq əməkdaşlıq və əcnəbi tələbələr şöbəsinin müdiri Sədaqət Fətullayeva, Keyfiyyət təminatı şöbəsinin müdiri Nərmin Həsənova, Tələbə Həmkarlar İttifaqı Komitəsinin sədri Elmin Novruzlu, Dil və tərcümə mərkəzinin direktoru Jalə Məmmədova, Mühəndislik fakültəsinin dekanı dosent Ulduz Ağayev və akkreditasiya ediləcək 3 proqram üzrə kafedra müdirləri – dosent Qadir Mansurov, professor Cavanşir Məmmədov və dosent Aqil Hüseynov görüşüblər.
