Sumqayıtda 48 yaşlı Mahmud həyat yoldaşı Səbinəyə (adlar şərtidir) xəsarət yetirib. Sumqayıt24 bu barədə 26 oktyabr tarixində Sumqayit.tv-yə istinadən xəbər verir.
Hadisə Xəzər bağlarında baş verib. Ər və arvad yaşadıqları fərdi həyət evində mübahisə ediblər. Nəticədə Mahmud qadının sağ gicgah nahiyəsinə vuraraq ona xəsarətlər yetirib.
Onun barəsində Cinayət Məcəlləsinin 128-ci (qəsdən sağlamlığa xəsarət yetirmə) maddəsi ilə ittiham irəli sürülüb. Təqsirləndirilən şəxs qismində ifadə verən Mahmud özünü təqsirli bilib.
O bildirib ki, Səbinə ilə 2001-ci ildə ailə həyatı qurub, iki oğulları var:
“Son vaxtlar ara-sıra aramızda mübahisə olur. Hadisə günü saat 19:30-da yaşadığımız evin həyətyanı sahəsində Səbinə məndən marketdən alış-veriş etməyimi istədi. Həmin vaxt pulumun olmadığını dedim. Bu zaman Səbinə: “Sənin 50 manat pulun var idi, haradadır o pul?” – deyə soruşdu. Mən də: “Borcum var idi, onu qaytarmışam”, – söylədim. Bu zaman aramızda mübahisə yarandı. Əsəblərimi cilovlaya bilmədim. Səbinənin baş və üz nahiyəsinə şillə vurdum. Səbinəyə xəsarət yetirən zaman evdə heç kim olmayıb. Aramızdakı münaqişə təxminən 5 dəqiqə davam etdi, münaqişəyə kənar şəxslər gəlməyiblər”.
Cinayət işinə Sumqayıt şəhər Məhkəməsində baxılıb. Təqsirləndirilən şəxsin zərərçəkmişlə barışması, zərərçəkmiş şəxsin ondan şikayətçi olmaması nəzərə alınıb. Mahmud barəsində olan cinayət təqibinə xitam verilib. O, cinayət məsuliyyətindən azad edilib.
