Sumqayıtda fəaliyyət göstərən müəssisənin əməkdaşı “Yüksəliş” müsabiqəsini qazanıb. Sumqayıt24 bu haqda 1 avqust tarixində xəbər verir.
Söhbət 33 yaşlı Fərid İsayevdən gedir. O, Sumqayıt Dövlət Universitetində İqtisadiyyat üzrə bakalavriatı fərqlənmə ilə bitirib. Azərbaycan Dövlət İqtisad Universitetində Vergi və vergiqoyma ixtisası üzrə magistratura, Vaşinqton Universitetinin Layihələrin idarə edilməsi üzrə Pre-Master proqramını oxuyub. Böyük Britaniyanın York və Fransanın Strasburq universitetlərində Logistika və təchizat zəncirinin idarə edilməsi üzrə MBA təhsili alıb.
Həmçinin ABŞ-nin Layihələrin İdarə edilməsi İnstitutunun professional akkreditasiyasına (PMP) malikdir və Böyük Britaniyanın Satınalmalar və Təchizat İnstitutunun (CİPS) sertifikasiya proqramını bitirib.
Fərid İsayev hazırda SOCAR “Azərikimya” İstehsalat Birliyində Satınalmalar və təchizat şöbəsinin rəisidir.
