Sumqayıtda 35 yaşlı Sənan bacısı Leylaya (adlar şərti verilib – red.) xəsarət yetirib. Sumqayıt24 bu haqda 4 noyabr tarixində Sumqayit.tv-yə istinadən xəbər verir.
Sənanın barəsində Cinayət Məcəlləsinin 128-ci (qəsdən sağlamlığa xəsarət yetirmə) maddəsi ilə ittiham elan edilib. Təqsirləndirilən şəxs qismində ifadə verən Sənan özünü təqsirli bilib. O bildirib ki, hadisə günü saat 21:00-da yaşadıqları evdə bacısı Leyla ilə aralarında şəxsi münasibətlər zəminində söz mübahisələri baş verib:
“Mübahisə getdikcə dərinləşdi. Bacım Daxili İşlər Nazirliyinin “102” xidmətinə zəng edəcəyini dedi. Bundan sonra bacımın qolundan tutub sıxaraq telefonunu əlindən aldım və boğazından tutaraq onun üz nahiyəsinə şillə vurdum. Əməlimdən peşmanam”.
Cinayət işinə Sumqayıt şəhər Məhkəməsində baxılıb. Təqsirləndirilən şəxsin zərərçəkmişlə barışması, Leylanın ondan şikayətçi olmaması nəzərə alınıb.
Bu səbəbdən cinayət təqibinə xitam verilib. Sənan cinayət məsuliyyətindən azad olunub.
