Sumqayıta verilən ərazilər açıqlanıb. Sumqayıt24 bu haqda 20 oktyabr tarixində İqtisadiyyat.az-a istinadən xəbər verir.
Əmlak məsələləri üzrə ekspert Ramil Qasımzadə bildirib ki, söhbət Sumqayıta yaxın Binəqədinin bir çox ərazilərindən, Noxvanı və Saray qəsəbələrindən gedir.
Ekspertin sözlərinə görə, həmin ərazilərdə daha çox kənd təsərrüfatı təyinatlı torpaq sahələridir. Buna baxmayaraq, insanlar burada fərdi evlər tikiblər. Nazirlər Kabinetində sözügedən ərazilərin yaşayış təyinatlı ərazilərə çevrilməsi məsələsinə baxılıb.
Ramil Qasımzadə hesab edir ki, torpaq sahələrinin şəhərlərə qatılması məqsədəuyğundur. O, administrativ cəhətdən həmin ərazilərin Sumqayıta daha yaxın olduğunu və atılan addımın təqdirəlayiq olduğunu söyləyib:
“Şəhər böyüdükcə ətraf ərazilərin birləşdirilməsi qarşıdakı dövrdə çoxmənzilli binaların inşası üçün rahatlığı təmin edir. Təəssüf ki, bu gün Bakı şəhərində də torpaq sahələri artıq məhdudlaşıb. Eyni vəziyyət artıq Sumqayıtda da yaşanır. Bu baxımdan şəhərə yaxın yerləşən torpaq sahələrindən səmərəli istifadə olunması iqtisadiyyatın inkişafı və sosial layihələrin həyata keçirilməsi üçün müsbət təsirə malikdir”.
Deputat Siyavuş Novruzov həmin ərazilərdə 9 min əhalinin yaşadığını bildirib.
