“British Council”in Azərbaycan nümayəndəliyi Sumqayıt Dövlət Universitetində olub. Sumqayıt24 bu haqda 30 sentyabr tarixində xəbər verir.
Nümayəndə heyətinə təşkilatın ölkə üzrə direktoru Nərgiz Hacıyeva, Korporativ layihələr üzrə koordinatoru Sevinc Ağazadə və Cənubi Qafqaz bölgəsinin imtahanlar üzrə rəhbəri Nərgiz Əkbərova daxil olublar.
Səfərin məqsədi SDU-nun akademik heyətinin peşəkar bacarıqlarının inkişafı istiqamətində “British Council”in imkanlarını və universitetin mümkün perspektivlərini müzakirə etmək idi.
Rektor Rüfət Əzizov ali təhsil ocağının fəaliyyəti, bu günü və beynəlxalq əlaqələri haqqında məlumat verib, ölkəmizdə təhsil sahəsində həyata keçirilən layihələrdən, ali təhsilin strateji istiqamətlərindən, dövlət proqramlarından danışıb.
Universitetin tədris imkanları ilə tanış olan direktor Nərgiz Hacıyeva SDU-da həyata keçirilməsi mümkün olan müəllimlər üçün APTİS proqramı, müəllim və tələbə heyəti üçün ingilis dili üzrə beynəlxalq dil sertifikatı imtahanlarından söz açıb.
