Bu gün Vətən Müharibəsi Qəhrəmanı Adil İbrahimlinin doğum günüdür.
Adil Asəm oğlu İbrahimli 9 sentyabr 1992-ci ildə Sumqayıt şəhərində anadan olub.
XTQ-nin baş leytenantı Adil İbrahimli 2020-ci il sentyabrın 27-də başlanan Vətən müharibəsində Murovdağ uğrunda gedən döyüşlərdə, Suqovuşan, Füzuli, Hadrut, Xocavənd, Şuşa döyüşlərində iştirak edib. 40 gün vuruşub. Son tapşırığı Şuşada olub və elə orada da böyük şücaət göstərib, yaralı olsa da, qəhrəmancasına savaşıb, lakin mənfur düşmən yenidən ona atəş açıb. Noyabrın 7-də Şuşanın azad edilməsi zamanı şəhidlik zirvəsinə ucalıb.
Göstərdiyi qəhrəmanlığa görə Prezidentin Sərəncamına əsasən, ölümündən sonra “Vətən Müharibəsi Qəhrəmanı” adına, “Vətən uğrunda”, “Şuşanın azad olunmasına görə”, “Kəlbəcərin azad olunmasına görə”, “Xocavəndin azad olunmasına görə” medalları ilə təltif olunub.
Adının əbədiləşdirilməsi məqsədilə doğma 14 nömrəli məktəbə Vətən Müharibəsi Qəhrəmanı Adil Asəm oğlu İbrahimlinin adı verilib.
