Elektrik cərəyanının vurduğu 13 yaşlı Aslan Əliyevin bibisi açıqlama verib. Sumqayıt24 bu haqda 24 oktyabr tarixində Bizim.media-ya istinadən xəbər verir.
Xəbər verdiyimiz kimi, xəsarət alan yeniyetmə öncə Sumqayıt Təcili Yardıma, oradan isə Bakıya – 5 nömrəli Şəhər Klinik Xəstəxanasına aparılıb.
Heç birində müalicə olunma və həyatda qalma şansı verilməyib. Bir qolu (naqilə toxunan əli) çiynindən amputasiya olunub. Bir neçə özəl xəstəxanaya müraciət ünvanlanıb, yalnız “Baku Medical Plaza” qəbul edib.
Məlumatlara görə, Aslan Əliyevi cərəyan yaşadığı ünvanda vurub. Guya o, əlindəki armaturla elektrik naqilinə toxunub. Digər iddialara görə isə hadisə elektrik naqili uşağın əli yetə biləcəyi hündürlükdə olduğu üçün yaşanıb.
Sosial şəbəkələrdə bu məsələyə görə “Azərişıq” ASC-ni ittiham edənlər də az deyil.
Yeniyetmənin bibisi Qərənfil Əliyeva hadisənin təfərrüatlarını danışıb.
O bildirib ki, başqa əraziyə düşən topu götürmək üçün hasara çıxan Aslanı elektrik cərəyanı boynundan vurub. Hadisəyə isə hasarla elektik naqili arasındakı məsafənin çox yaxın olması səbəb olub:
“Aslan qardaşım oğludur. Corat qəsəbəsində yerləşən evlərindən bir qədər kənarda uşaqlarla top oynayırmışlar... Top yol qırağından kənardakı hasarın o biri tərəfinə düşüb. Aslan topu götürmək üçün hasara çıxıb və o biri tərəfə keçmək istəyib.
Əyilib naqilin altından keçmək istəyəndə elektrik cərəyanı vurub. Boynundan “tok” vurandan sonra uşaq əlini uzadıb və elektrik cərəyanı qolunu da tamamilə sıradan çıxarıb. Hasar 10 min voltluq, alüminiumdan ibarət xəttə çox yaxın məsafədə olub. Hətta elə yaxın olub ki, uşaq heç ayaq üstündə belə durmayıb”.
Qərənfil Əliyevanın sözlərinə əsasən, hasarın kim tərəfindən tikildiyi bəlli deyil:
“Yol qırağında olan bir hasardır və yaşayış yoxdur. Kim tikib, onu da bilmirik. Öyrənmək lazımdır ki, hasara alınan bu ərazi kimindir? Yüksək gərginlikdə elektrik cərəyanı xətti istənilən halda hündür məsafədən çəkilməli idi. Yaxud da hasar olmamalı idi. Bu məsələ bizə də qaranlıqdır. Bizə məlumat verildi ki, Baş prokurorluq tərəfindən məsələ araşdırılacaq və ekspertiza təyin olunacaq”.
Əliyeva əlavə edib ki, cərəyan uşağın boynundan vurduğu üçün digər orqanlarını da zədələyib:
“Boynundan başlayaraq dabanına qədər digər orqanlarını – ürəyi, böyrəyi də zədələyib. Üç gündür ki, canı ilə çırpınır. Artıq uşağın bir qolunu dibindən amputasiya ediblər. Həkimlər ümidli danışmırlar. Gözləyirik. Hamımız pərişanıq”.
