Sumqayıtda yeni müəssisə tikiləcək. Sumqayıt24 bu haqda 2 sentyabr tarixində Report.az-a istinadən xəbər verir.
İqtisadiyyat naziri Mikayıl Cabbarov Pekinə səfər edib. O, “Wenzhou Nixin Trading Co., Ltd” şirkətinin sədri Fan Cianşan ilə potensial əməkdaşlıq imkanlarından danışıb.
Tərəflər arasında Azərbaycanın biznes və investisiya mühiti, şirkət tərəfindən ölkəmizdə keramik plitələr istehsal edən zavodun tikintisi layihəsi üzrə görülən işlər barədə müzakirələr aparıb.
Layihəyə əsasən, Sumqayıt Kimya Sənaye Parkının rezidenti “Azərbaycan Vanhong Ceramics Co” MMC Sənaye Parkının 22,8 hektar ərazisində müəssisə inşa edəcək. Zavodda Çinin qabaqcıl texnologiyalarının tətbiqi ilə yüksək keyfiyyətli müxtəlif ölçülərdə keramik plitələrin istehsalı aparılacaq. Məhsullar daxili bazarda satılmaqla yanaşı, region və MDB ölkələrinə ixrac olunacaq.
100% Çin kapitallı layihənin investisiya dəyəri 70 milyon manata yaxındır. Müəssisənin illik istehsal gücü 18,5 milyon kvadratmetr keramik plitədir. Burada 400 nəfər daimi işlə təmin olunacaq.
