Bu gün Vətən müharibəsi şəhidi Fərhad Əliyevin mövlududur.
Fərhad İlham oğlu Əliyev 7 sentyabr 1993-cü ildə Sumqayıt şəhərində anadan olub. Ailənin tək övladı olan Fərhadın bir yaşı tamam olmamış atası rəhmətə getdiyindən onu anası tək böyüdüb. Fərhad 9-cu sinfə kimi 20 saylı məktəbdə ibtidai təhsil alıb. Daha sonra təhsilini Bakı İdarəetmə Kollecində davam etdirib.
Naftalan şəhərində hərbi xidmətini başa vurduqdan sonra 877-ci hərbi hissədə MAXE kiçik çavuş kimi xidmət edib.
2020-ci il sentyabrın 27-də başlanan Vətən müharibəsi zamanı Füzuli və Hadrutun azad edilməsində iştirak edib. Oktyabrın 20-də Füzuli rayonunun Gecəgözlü kəndində düşmən üzərinə hücuma keçərkən həlak olub. Sumqayıt Şəhidlər xiyabanında dəfn edilib.
Əliyev ölümündən sonra "Vətən uğrunda" və "Xocavəndin azad olunmasına görə" medalları ilə təltif edilib.
