Bu gün şəhid Asiman Allahverdiyevin doğum günüdür. Bu haqda 23 avqust tarixində Sumqayıt24 xəbər verir.
Azərbaycan Xüsusi Təyinatlı Qüvvələrinin əsgəri Asiman Niyaz oğlu Allahverdiyev 23 avqust 1998-ci ildə Sumqayıt şəhərində anadan olub. Sumqayıt şəhər İnternat tipli Gimnaziyada təhsil alıb. Asiman 2016-cı ildə hərbi xidmətə çağırılıb.
Hərbi xidmətini başa vurduqdan sonra Müdafiə Nazirliyinin N saylı hərbi hissəsində uzun müddətli xidmət keçib. Kəşfiyyatçı olaraq döyüş tapşırıqlarını yüksək səviyyədə yerinə yetirdiyi üçün komandirləri tərəfindən dəfələrlə diplom, təşəkkür və hədiyyələrlə təltif olunub.
2020-ci il sentyabrın 27-də başlanan Vətən müharibəsi zamanı Xocəvənd və Cəbrayıl istiqamətində gedən döyüşlərdə iştirak edib. Allahverdiyev Füzuli şəhərinə daxil olan ilk kəşfiyyatçılardan biri olub. Oktyabrın 9-da Füzuli rayonu ərazisində döyüş tapşırığını yerinə yetirərkən düşmən tərəfindən açılan atəş nəticəsində aldığı xəsarətdən şəhid olub.
Ölümündən sonra "Hərbi xidmətlərə görə" və "Füzulinin azad olunmasına görə" medalları ilə təltif edilib.
