Sumqayıtda "Cənnətim Qarabağ..." adlı ədəbi-bədii gecə keçirilib. Bu barədə Sumqayıt24 xəbər verir.
Tədbir Heydər Əliyev Mərkəzi və Xidmət Sahələri üzrə Sumqayıt Dövlət Peşə Təhsil Mərkəzinin əməkdaşlığı çərçivəsində təşkil olunub. Burada İcra Hakimiyyətinin nümayəndəsi Fərman Kazımov, Veteran Təşkilatının sədri Sovet Şükürov, YAP Sumqayıt şəhər təşkilatının sədr müavini Cavid Məmiyev, Tarixi Muzeyin direktor müavini Namiq Əliyev, qazilər, Peşə Təhsil Mərkəzinin mühəndis-pedaqoji heyəti, valideynlər, tələbə kontingenti və Heydər Əliyev mərkəzinin əməkdaşları iştirak ediblər.
İlk növbədə tələbələrin ifasında 8 Noyabr - Zəfər Gününə həsr edilmiş musiqi, bədii-qiraət, musiqi alətlərində ifa və rəqs nömrələri təqdim edilib. Sonra qonaqlar 44 günlük Vətən müharibəsi haqqında çıxışlar edib, milli ruhda yetişən gəncliklə qürur duyduqlarını bildiriblər.
