Uşaqların hüquq müdafiəçisi Mehriban Zeynalova itin dişlədiyi 8 yaşlı Tunardan danışıb. Sumqayıt24 bu haqda 19 iyul tarixində 1news.az-a istinadən xəbər verir.
“Təmiz dünya” İB-nin başçısı bildirib ki, həmin uşaqla mütləq sosial işçilər çalışmalıdırlar:
“Tendesiyaya əsasən, bir çox hallarda heyvanlara qarşı qəddar olan uşaqlar gələcəkdə təcavüzkar olurlar. Buna görə uşaqla mütləq şəkildə psixoloq işləməlidir. Təəssüf ki, ana normal tərbiyə verməyib və ona mütəxəssis köməyi lazımdır.
Özünü heyvana oxşatmağına gəldikdə isə… Maraqlıdır, bu uşaq məktəbə gedir, ya anası onu hər şeydən kənarlaşdırıb? Ümumiyyətlə, qadının psixoloji halı necədir, təhsili varmı? Onun da qeyd-şərtsiz yardıma ehtiyacı var: qadınla sosial və psixoloji işlər aparılmalıdır. Çünki normal insan övladını bu formada tərbiyələndirmir. Analar, adətən, uşaqlarının öz yaşıdları ilə ünsiyyətçil olmalarını, oxuyub və inkişaf etmələrini istəyirlər…
İlkin müşahidəmə görə, konkret bu halda uşaq inkişafdan geri qalır. Lakin situasiyaya obyektiv qiyməti psixoloq verə bilər. Tunarla danışandan sonra hər-hansı nəticə çıxarmaq olar”.
Xatırladaq ki, hadisə iyulun 8-də Sumqayıtda baş verib. Tunar həyətlərindəki itə çubuqla hücum edib, heyvan isə onu dişləyib. Uşağın quduzlaşdığı ehtimal edilsə də, bu məlumat təkzib olunub.
