Şəhid teleoperator Sirac Abışovun doğum günüdür. O, 29 avqust 1989-cu ildə anadan olub.
Şəhid Milli Qəhrəman Çingiz Mustafayevin hərbi jurnalistikadakı qəhrəmanlıq yolunu davam etdirən Sirac Abışov İkinci Qarabağ müharibəsindən sonra işğaldan azad edilən ərazilərdə çəkiliş aparırdı. Lakin Sirac da həmkarı Çingizlə eyni taleni yaşayır, növbəti erməni təxribatının qurbanı olur.
Belə ki, Vətən müharibəsindən sonra AZƏRTAC və AzTV-nin əməkdaşları işğaldan azad olunmuş ərazilərdə çəkiliş aparmağa yollanırlar. 4 iyun 2021-ci ildə Kəlbəcər rayonunun Susuzluq kəndinə gedən yolda onların içərisində olduğu "KamAZ" markalı avtomobil tank əleyhinə minaya düşür. Nəticədə AzTV-nin operatoru Sirac Abışov, AZƏRTAC-ın müxbiri Məhərrəm İbrahimov və Kəlbəcər Rayon İcra Hakimiyyəti başçısının Susuzluq kənd inzibati dairəsi üzrə nümayəndəsinin müavini Arif Əliyev həlak olublar, dörd nəfər isə yaralanıb.
Sirac Abışov Sumqayıt Şəhidlər xiyabanında torpağa taşırılıb.
Prezident İlham Əliyev Sirac Abışovu ölümündən sonra "3-cü dərəcəli “Vətənə xidmətə görə” ordeni ilə təltif edib.
Qeyd edək ki, bu gün, həm də Şəhid Milli Qəhrəman Çingiz Mustafayevin də anadan olduğu gündür.
