Bu gün “Gənclik şəhəri” adlanan Sumqayıtın 75 illik yubileyidir. Bu böyük bir hadisəni həm Sumqayıt camaatı, həm də əslən sumqayıtlı olanlar böyük təmtəraqla qeyd edirlər. Sumqayıt əhali sayına görə Bakıdan sonra Azərbaycanın ən böyük ikinci şəhəridir.
75 illik müddətdə böyük bir inkişaf yolu keçən Sumqayıt ölkəmiz üçün məşhur simalar, istedadlı gənclər yetişdirib.
Belə şəxsiyyətlərdən biri də paracüdo üzrə ikiqat Paralimpiya Oyunları çempionu, Azərbaycanın səkkizqat Avropa çempionu, Əməkdar idman ustası İlham Zəkiyevdir.
Sumqayit24.az-ın əməkdaşı doğma şəhərin 75 illik yubileyi münasibətilə onunla həmsöhbət olub.
Müsahibəni təqdim edirik:
- Öncə sizi bayramınız münasibətilə təbrik edirik. 75 illik yubileyiniz mübarəkdir.
- Bəli, bu gün siz məni, mən də bütün Sumqayıt əhlini təbrik edirəm. Uzun və inkişaf dolu bir yol qət etmişik. Bu yolda əməyi keçən, şəhərimizi dünyaya tanıdan sumqayıtlı şəxslərə təşəkkürümü bildirirəm.
- İlham bəy, sumqayıtlı olaraq bu gün 75 illiyi qeyd edilən şəhər haqqında nə demək istəyərdiniz?
- Sumqayıt əhalisi mehriban, sakit, gözəl şəhərdir. Hamı bir-birinə kömək etməyə çalışır. 75 illik yubileyimiz isə təmtəraqlı şəkildə qeyd edilir.
- Neçə ildir Sumqayıtda yaşayırsınız?
- Sumqayıtda doğulmuşam, burda böyümüşəm. Sumqayıt şəhərinin 5 saylı orta məktəbinin məzunuyam. Hazırda da burda yaşayıram. 44 ildir ki, sumqayıtlıyam (gülür).
- Bakıya köçməyi düşünmüşünüz?
- Bu sualı mənə çox adam verib. Bakı paytaxtımızdır, doğmadır. Amma Sumqayıt tamam başqadır. Bakıda köçüb yaşamaram. Sumqayıt mənim yaşayışım üçün çox rahatdır. Doğulandan buradayam, qoyub gedə bilmərəm. Hər küncündə, hər yerində xatirəm var.
- “Gənclik şəhəri”nin indiki gəncləri nələrə maraq göstərir?
- Sumqayıtlı uşaqlar bir çox sahələrdə həmişə uğur qazanıblar. İndi də hər bir sahə üzrə püxtələşən gənclər var. Respublika üzrə öndə gedən idmançılar elə Sumqayıtın yetirmələri olub. Allah köməkləri olsun, həmişə seçiliblər. Gənclərə dəstək olmaq lazımdır.
- Sumqayıtın gələcəyini necə görürsünüz?
- Şəhərimizin gələcəyi çox parlaqdır. Sağ olsun, Zakir müəllim. Öz töhfəsini gələn gündən verib. Daha da inkişaf yolunda irəliləyirik. Gələcəyimiz də çox parlaqdır. Gənclər varsa, deməli gələcək də var.
Fidan İlqar
