"Təkərli kitab dükanı" Sumqayıta gəlib. Sumqayıt24 bu haqda 10 noyabr tarixində xəbər verir.
Sözügedən layihəni "Əli və Nino" mağazalar şəbəkəsinin rəhbəri Nigar Köçərli və Qanun Nəşriyyatının sahibi Şahbaz Xuduoğlu ərsəyə gətiriblər. "Təkərli kitab dükanı" şəhərin “Göyərçin" abidəsindən başlayaraq digər ünvanlara hərəkət edib.
Şahbaz Xuduoğlunun sözlərinə görə, layihə tədricən öz auditoriyasını qazanır:
"Bu gün təkərli kitab Sumqayıtda olub. Dünən Aşağı Güzdək, yəni köhnə Güzdəkdə və Müşfiq qəsəbəsində olduq. Bizi sosial şəbəkələrdə izləyirlər, yanımıza gəlirlər. Bundan böyük mənəvi dəstək ola bilməz.
"Təkərli kitab dükanını" çox yerlər dəvət edir. Əmin olun, dəvət aldığımız hər yerdə olacağıq. Sumqayıtda oranın simvolu olan "Göyərçin"ndən başlayıb vəziyyətə uyğun hərəkət etdik".
Qeyd edək ki, "Təkərli dükan"ın məqsədi kitabı daha da əlçatan etməkdir. Bu səyyar dükan bir maşından ibarətdir və Azərbaycanı qarış-qarış gəzəcək. Ən ucqar kəndlərdə yaşayan insanlara həm sərfəli qiymətə kitablar təqdim ediləcək, həmçinin onlar məşhur yazıçılar, tanınmış mədəniyyət nümayəndələri ilə görüşəcəklər.
