Sumqayıtda yaşayış binasında partlayış olub. Sumqayıt24 bu haqda 30 sentyabr tarixində Fövqəladə Hallar Nazirliyinə (FHN) istinadən xəbər verir.
Hadisə 10-cu mikrorayonda, doqquzmərtəbəli binanın 1-ci mərtəbəsindəki ümumi sahəsi 47 kv.m olan ikiotaqlı mənzildə qeydə alınıb. Əraziyə Dövlət Yanğından Mühafizə Xidmətinin qüvvələri cəlb olunub. İlkin ehtimala görə, partlayışın təmir işləri aparılan zaman təhlükəsizlik qaydalarının pozulması nəticəsində baş verdiyi müəyyən olunub.
Nəticədə bir otağın döşəməsi qismən yanıb, partlayış dalğasının təsirindən pəncərə çərçivəsi yerindən çıxıb, mənzilə ziyan dəyib. Mənzilin sahibi, 45 yaşlı Vitalik Əliyev və 41 yaşlı Səbinə Əliyeva müxtəlif dərəcəli xəsarətlər alıblar.
Ərazidə müvafiq təhlükəsizlik tədbirləri görülüb. Aidiyyəti qurumlar tərəfindən araşdırma aparılır.
