Sumqayıt sakini və daha 2 nəfərin ölümü ilə nəticələnən ağır yol qəzasını törətmiş sürücü Vüqar Abdullayevin məhkəməsi başa çatıb. Bu haqda 10 oktyabr tarixində Sumqayıt24 Qafqazinfo.az-a istinadən məlumat verir.
Qəza fevralın 17-si Siyəzən rayonunun Beşdam kəndində qeydə alınıb. Hərəkətdə olan “Mercedes Vito” markalı miniven idarəetmədən çıxaraq “Opel” markalı avtomobillə toqquşub.
Hadisəyə səbəb olan 39 yaşlı V. Abdullayev Cinayət Məcəlləsinin 263.3-cü maddəsi ilə təqsirləndirilib.
Sumqayıt Ağır Cinayətlər Məhkəməsində keçirilən prosesdə V.Abdullayev bildirib ki, hadisə qarlı-şaxtalı hava şəraitində avtomobilin sürüşməsi nəticəsində baş verib.
Məhkəmənin hökmü ilə ona 4 il sürücülük hüququndan məhrum edilməklə 5 il 6 ay həbs cəzası verilib.
Qeyd edək ki, hadisə nəticəsində ölənlərdən biri Sumqayıt şəhər sakini, 39 yaşlı Aygün Vəliyeva idi. O, Siyəzən rayon Məşrif kənd tam orta məktəbinin müəllimi olub.
