"My Beach"in baş inzibatçısı Firudin Veyisov müştərilərin narazılığı ilə bağlı cavab verib. Sumqayıt24 bu haqda 13 iyul tarixində News24.az-a istinadən xəbər verir.
Xəbər verdiyimiz kimi, Novxanıda yerləşən istirahət mərkəzində ümumi məbləğə 25% xidmət haqqı əlavə olunur. Firudin Veyisovun sözlərinə görə, şou-proqram olan hər bir restoranda bu qədər servis haqqı alınır:
"Şou-proqram olan restoranların hər birində ümumi hesabın üzərinə 20% servis haqqı gəlir. Bizim də proqramımızda şou-proqram və karnaval-şou var. Bu xidmət haqqı bizdə 25%-dir. Aldığımız əlavə 5% məhz həmin karnaval-şouya görədir. Eyni zamanda şou-proqramlara tanınmış müğənniləri, Xalq artistlərini dəvət edirik. Həm də bu, müştərinin seçiminə buraxılıb. Əgər müştəri şou-proqramda iştirak etmək istəmir və kabinetdə oturursa, ondan cəmi 10% servis haqqı alınır. Əslində bizim şou-proqramın dəyəri 25%-dən də yüksəkdir. Amma biz az alırıq. Adi sirkdə bilet 20 manatdır. Biletə yalnız göstəri daxildir, yəni yemək verilmir. Amma biz burada saat 7-dən 9-a qədər karnaval-şou göstəririk".
Baş inzibatçı həmin servis haqqının ofisianta çatması məsələsinə də aydınlıq gətirib:
"Dənizkənarı məkanlarda çalışan ofisiantlar həm maaş, həm də faiz alırlar. Ümumi hesabın 10%-i onlara çatır. Bundan əlavə, hər birinə aylıq maaş da verilir".
