Sumqayıtda qeyri-adi oğurluq hadisəsi baş verib. Bu haqda 7 oktyabr tarixində Sumqayıt24 Lent.az-a istinadən məlumat verir.
“Proses” 2022-ci ilin dekabr ayından 2023-cü ilin yanvar ayınadək olan müddət ərzində davam edib. 33 yaşlı Nərgiz Hacıyeva həmin ərəfədə 9-cu mikrorayonda kirayədə yaşayıb.
O, həmin evdən mənzil sahibinə məxsus dəyəri ümumilikdə 1622 manat olan əşyaları – qadın çantaları, paltarlar, adyal, qab-qacaq, suvenirlər və s. ayrı-ayrı vaxtlarda götürərək, tanışı Sevda Orucovaya (ad-soyad şərti) hədiyyə kimi verib.
Bu əməllərinə görə onun barəsində Cinayət Məcəlləsinin 179.1-ci (mənimsəmə) maddəsi ilə cinayət işi başlanıb. Hakim Rövşən Xəlilov tərəfindən işə baxılması oktyabrın 13-nə təyin edilib.
Qeyd edək ki, təqsirləndirilən şəxs N. Hacıyeva Cinayət Məcəlləsinin “Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama” maddəsi ilə təqsirli bilinmişdir. O, 31 may 2023-cü il tarixli hökm ilə 2 il müddətinə azadlığın məhdudlaşdırılması (Elektrok qolbaq taxmaqla) cəzasına məhkum edilib.
