Peşəkar Futbol Liqasının (PFL) nümayəndələri Mehdi Hüseynzadə adına stadionda təftiş aparıblar. Sumqayıt24 bu haqda 15 noyabr tarixində Qaynarinfo.az-a istinadən xəbər verir.
PFL-in media və marketinq direktoru Sənan Abdullayev bildirib ki, oyunun keçirilməsi üçün müəyyən prosedurlar var. "Sumqayıt” klubunun müraciəti əsasında orada yolxama keçirilib:
“Müəyyən qeydlərimiz oldu və onları klubun diqqətinə çatdırdıq. İcra olunmalı müəyyən prosedurlar mövcuddur. Daha ətraflı məlumat üçün klubla əlaqə saxlasanız, yaxşı olar”.
"Sumqayıt”ın mətbuat katibi Zaur Xudiyev isə PFL-in kluba bir neçə qüsurla bağlı məlumat çatdırdığını qeyd edib:
"Bir neçə məsələ ilə bağlı iradlar çatdırıldı. Hazırda bu yöndə işlər aparılır. Yəqin ki, daha uzun müddət gözləmək lazım olmayacaq. Aradan qaldırılacaq xırda nüanslardır.
Sırf oyun təşkilatçılığı ilə bağlı məsələlərdir. Onların içərisində mətbuat nümayəndələri üçün ayrılmış loja ilə bağlı iradlar da var.
Yəni, qlobal problemlər deyil. Hər halda yaxın vaxtlarda klubdan rəsmi açıqlama veriləcək.
Çalışırıq ki, ən qısa zamanda çatışmazlıqları aradan qaldıraq və stadionda oyun keçirək. Bunun nə zaman yoluna qoyulacağı haqda isə dəqiq nəsə deyə bilmərəm”.
