Qəsdən adam öldürməyə cəhddə təqsirləndirilən Nail Mahmudovun məhkəməyə verdiyi ifadəsi bəlli olub. Bu haqda 21 sentyabr tarixində Sumqayıt24 Pravda.az-a istinadən məlumat verir.
Proses Sumqayıt Ağır Cinayətlər Məhkəməsində hakim Fəhmin Hümbətovun sədrliyi ilə keçirilib. N. Mahmudov elan edilmiş ittiham üzrə özünü qismən təqsirli bilib.
Təqsirləndirilən şəxs ifadəsində göstərib ki, zərərçəkmiş Cavid Mahmudov onun əmisinin nəvəsidir. 2011-ci ildə Nanə Mahmudova (şərti) ilə ailə həyatı qurub.
O bildirib ki, daha sonra arvadı ilə zərərçəkmiş şəxs arasında yaxın münasibət olduğunu öyrənib: “Onların arasındakı münasibəti kənd əhalisi bilirdi. Lakin mənim çox gec məlumatım oldu. Ona görə ki, səhər evdən çıxıb axşamadək işləyirdim. Bu məsələ ortaya çıxdıqdan sonra Cavid kənddən getdi və uzun müddət geri qayıtmadı. Zərərçəkmiş şəxsi vurduğum silah 16 kalibrli tək lüləli ov silahı idi. Silahı sahədən tapmışdım. Həmin silahı 10 ildir ki, saxlayırdım. Ondan bağ sulamağa gedərkən itləri və s. qorxutmaq üçün istifadə edirdim”. O söyləyib ki, hadisə günü, 8 yanvar 2022-ci il tarixində zərərçəkmiş Cavid Mahmudovu yolda görüb: “Bu zaman üzərimdə olan silahı ona tərəf tutdum və Cavidi qorxutmaq istədim. O isə əli ilə silahın lüləsindən tutaraq dartdı. Silahı dartan zaman qəflətən atəş açıldı və zərərçəkmiş şəxs yaralandı”. Nail Mahmudov istintaq ifadısində bildirib ki, Cavidlə Nanənin etdiyi hərəkət kənd camaatının içərisində artıq onu çox rüsvay etmişdi: “Çünki bu bir namus məsələsi idi və qohumum olmasına baxmayaraq, Cavid mənim qeyrətimə əl uzatmış, arvadımla yaxın münasibətdə olmuşdu”.
Məhkəmənin hökmü ilə təqsirləndirilən şəxs 9 il müddətinə azadlıqdan məhrumetmə cəzasına məhkum edilib.
