Qrosmeyster Şəhriyar Məmmədyarov 2018-ci ildə qazandığı uğurlardan danışıb. Sumqayıt24 bu haqda 30 avqust tarixində Qaynarinfo.az-a istinadən xəbər verir.
Sumqayıtlı şahmatçı sosial şəbəkələrdəki müzakirələrə qoşularaq həmin illərdə yaşadığı hissləri paylaşıb. O, şahmat lövhəsi arxasında ağladığını da bildirib:
"Həmin turnir karyeramın ən çətin anı idi. Son turda birinci pilləni tutmaq üçün Kramnikə mütləq qalib gəlməli idim. Katalon debütündə çox riskli gediş etdim, çünki sadəcə qələbə haqda düşünürdüm. Bu oyunda uduzsaydım, üçüncü, heç-heçə etsəydim ikinci olacaqdım. Mənə yalnız qələbə lazım idi. Partiyanın sonunda anladım ki, artıq uda bilməyəcəyəm. Gördüm ki, oyun heç-heçəyə gedir və bununla da dünya çempionluğu uğrunda mübarizədə uduzacağam. Başımı aşağı salıb sadəcə beş dəqiqə hönkür-hönkür ağladım. Həyatımda ilk dəfə idi ki, lövhə arxasında ağlayırdım. Və beləcə titulla sağollaşdım. Həmin an anladım ki, bu, mənim şahmat tacı uğrunda apardığım son oyunum idi. Bundan sonra heç vaxt "İddiaçılar turnirində" mübarizə aparmaq istəməmişəm. Çünki həmin o beş dəqiqə ərzində mən şahmat taxtası arxasında bütün şahmat həyatımla sağollaşdım".
Qeyd edək ki, Məmmədyarov 2018-ci ildə karyerasındakı ən yüksək reytinqə yüksəlib (2826). Bundan əlavə, Şah həmin il Almaniyada keçirilmiş "İddiaçılar turnirində" ikinci yeri tutub. Sözügedən turnirin qalibi isə amerikalı Fabiano Karuana olub.
