Bu gün Sumqayıt şəhərini Saray qəsəbəsi ilə birləşdirən körpünün söküləcəyi ilə bağlı qərar qəbul edilib. Hər kəsi maraqlandıran əsas məsələ təmir-bərpa işlərinin nə zaman bitəcəyidir.
Məsələ ilə bağlı Sumqayit24.az-ın əməkdaşı Azərbaycan Avtomobil Yolları Dövlət Agentliyinə sorğu ünvanlayıb.
Qurumun mətbuat katibi Anar Nəcəflinin sözlərinə görə, 1970-ci illərdə inşa edilmiş və Sumqayıt şəhərini Saray qəsəbəsinə birləşdirən körpü keçidini aidiyyəti qurumların mütəxəssisləri birlikdə baxış keçiriblər:
“Məsələ Nəqliyyatı Əlaqələndirmə Şurasında müzakirəyə çıxarılıb. Körpüdə aparılmış müayinə və sınaqlar nəticəsinə əsasən konstruksiyada yük götürmə qabiliyyətini aşağı salacaq qüsurların mövcud olduğu və körpünün qəzalı vəziyyətdə olması aşkar edilib.
Mütəxəssis rəyi və müzakirələrin nəticəsi nəzərə alınaraq körpünün sökülməsi, yerində yeni körpünün inşa edilməsi barədə qərar qəbul olunub”.
Bu işlər Azərbaycan Avtomobil Yolları Dövlət Agentliyinə həvalə edilib. Yeni köpünün inşası zamanı avtomobil yolunun tamamilə bağlanması və hərəkətin dayandırılması nəzərdə tutulur. Bu gün gecə saat 00:00-dan etibarən körpünün söküntüsü istiqamətində tərəfimizdən işlərə başlanılacaq. Saray körpüsünə aparılan söküntü və tikinti işləri ilə əlaqədar olaraq sürücülərin alternativ yollardan istifadə etmələri xahiş olunur. Tikintinin nə zaman sonlandırılacağı ilə bağlı hələlik fikir demək çətindir”, - deyə A.Nəcəfli fikrini tamamlayıb.
Qeyd edək ki, körpünün tikintisinə prezident İlham Əliyev 9 milyon 960 min manat pul ayırıb.
Nəzrin Vahid
