Saray qəsəbə 2 nömrəli tam orta məktəbində şəhid Rauf İbadovun anım günü münasibətilə tədbir keçirilib. Bu haqda 27 oktyabr tarixində Sumqayıt24 Den.az-a istinadən xəbər verir.
Tədbirdə şəhidin valideynləri və məktəbin pedaqoji kollektivi iştirak ediblər. Toplantıda Dövlət Himni səsləndirilib, şəhidlərin ruhu bir dəqiqəlik sükutla yad edilib.
Daha sonra şəhid Rauf İbadovun keçdiyi döyüş yoluna nəzər salınıb. Tədris ocağının şagirdləri vətənimizə, şəhidlərimizə həsr etdikləri şeirləri səsləndirib, mahnılar ifa edib, eləcə də şəhid Rauf İbadovun şəhidlikdən öncə qələmə aldığı kəlamlarını dilə gətiriblər.
Qeyd edilib ki, məktəbin 2 sinfinə şəhid Rauf İbadovun adı verilib.
Qəhrəmanımız ölümündən sonra "Vətən uğrunda", "Cəbrayılın azad olunmasına görə" və “Füzulinin azad olunmasina görə” medalları ilə təltif edilib.
