Sumqayıt Dövlət Universitetində “Əsrin müqaviləsi” müstəqil respublikamızın salnaməsinə yeni neft strategiyasının şanlı səhifəsi kimi yazılıb” mövzusunda məşğələ keçirilib. Bu haqda 22 sentyabr tarixində Sumqayıt24 SDU-ya istinadən məlumat verir.
Toplantı universitetdəki Heydər Əliyev Məktəbində baş tutub. Tədbiri açan ali təhsil müəssisəsinin rektoru Rüfət Əzizov ilk olaraq iştirakçıları salamlayıb, sentyabr ayının 19-da Azərbaycan Respublikası Silahlı Qüvvələrinin keçirdiyi lokal antiterror əməliyyatının qısa müddətdə, uğurla başa çatması münasibətilə onları təbrik edib.
Rektor “Əsrin müqaviləsi”nin tarixi əhəmiyyətindən, bu müqavilənin ümummilli lider Heydər Əliyevin şəxsi nüfuzu, qətiyyətli mövqeyi və həmin dövrdə Azərbaycan nümayəndə heyətinin rəhbəri kimi danışıqlar prosesində iştirak edən İlham Əliyevin diplomatik məharəti nəticəsində imzalandığını vurğulayıb.
Daha sonra Tarix və coğrafiya fakültəsinin dekanı, professor, Əməkdar müəllim Adil Baxşəliyev və Kimya və onun tədrisi metodikası kafedrasının müdiri dosent Musa Mustafayev mövzu ilə bağlı çıxış ediblər.
