Sumqayıt Dövlət Universitetində (SDU) görüş keçirilib. Sumqayıt24 bu haqda 20 dekabr tarixində xəbər verir.
Tədbirdə “SOCAR Downstream” və strukturuna daxil olan “Azərikimya” İB, “SOCAR Karbamid”, “SOCAR Polymer” müəssisələrinin direktorları, Sumqayıt Texnologiyalar Parkının (STP), BP şirkətinin, “Azersun Holding”ə daxil olan zavod-fabriklərin, “Azərişıq” ASC, “Azərenerji” ASC, “Gilan Tekstil”, “Nobel Energy”, “Kapital Bank”, “Azertexnolayn” və “Technol” şirkətlərinin direktorları, rəhbər şəxsləri və insan resursları idarəçiləri iştirak ediblər.
SDU-nun rektoru Rüfət Əzizov universitetlə sənaye müəssisələri arasında mümkün əməkdaşlıqdan danışıb. Tələbələr üçün təcrübə proqramlarının təşkilində, tədrisdə məzmunun yenilənməsində, elmi-tədqiqat layihələrində, akademik heyət və tələbələr üçün qısamüddətli təlimlərin təşkilində, praktik konfrans və tələbə düşərgələrinin keçirilməsində birgə fəaliyyətlərin əhəmiyyətini vurğulayıb.
Qonaqlar da universitet-sənaye iş birliyinin məqsəd və mahiyyətindən söz açıblar. Təcrübə proqramları, praktik bacarıqlar üçün “workshop”lar, laboratoriya və məzmunun yenilənməsi, tələbələrin ixtisasa həvəsləndirilməsi, müəllimlərin və tələbələrin praktik bacarıqlarının artırılması, araşdırma və optimallaşdırma layihələri, tədrisdə sənaye müəssisələrindən mütəxəssislərin iştirakı, sənaye üçün ixtisasartırma kurslarının təşkilində əməkdaşlığın rolunu xüsusi vurğulayıb, SDU ilə təmsil etdikləri müəssisələrin əlaqələrinin daha da genişlənəcəyini qeyd ediblər.
Görüşdə 2024-cü il üçün birgə fəaliyyət planının hazırlanması müzakirə olunub.
