“BP” şirkəti Sumqayıt Dövlət Universitetinin (SDU) nümayəndələri arasında görüş keçirilib. Bu haqda 3 avqust tarixində Sumqayıt24 xəbər verir.
SDU-da baş tutan görüşdə “BP”nin Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli və ali təhsil müəssisəsinin rektoru professor Elxan Hüseynov iştirak ediblər.
Öncə iştirakçılar ümummilli lider Heydər Əliyevin universitetin foyesində ucaldılmış büstü önünə gül dəstələri düzərək xatirəsini ehtiramla yad ediblər. Daha sonra vitse-prezident Bəxtiyar Aslanbəyli çıxış edərək şirkətin fəaliyyət istiqamətləri, həyata keçirdiyi sosial layihələr barədə ətraflı məlumat verib.
Tərəflər gələcək əməkdaşlığın istiqamətini müəyyən edəcək Anlaşma memorandumu təşəbbüsü ilə çıxış ediblər. Həmin memorandumun tərtib edilməsi İşçi qruplarına həvalə edilib. Həmçinin istehsalat və tədris müəssisələri arasında əməkdaşlıq əlaqələrinin inkişafına dair qarşılıqlı maraq doğuran digər məsələlər barədə fikir mübadiləsi aparılıb.
