Sumqayıt Dövlət Universitetinin (SDU) tələbələri “Yay Təcrübə Proqramı”nda iştirak ediblər. Bu haqda 9 sentyabr tarixində Sumqayıt24 xəbər verir.
SDU və “SOCAR Downstream Management” MMC arasında imzalanan Anlaşma memorandumuna əsasən, ali təhsil müəssisəsinin 4 tələbəsi Heydər Əliyev adına Neft Emalı Zavoduna, SOCAR-ın Türkiyənin İzmir şəhərində fəaliyyət göstərən törəmə müəssisələri “Petkim” neft-kimya kompleksi və “Star” Neft Emalı Zavoduna ezam ediliblər.
Kimya mühəndisliyi ixtisasının tələbələri Lamiyə Sayılova və Səddan Səfərov SƏTƏM, İslam Məmmədzadə İstehsalat, Proseslərin avtomatlaşdırılması mühəndisliyi ixtisasının tələbəsi Qüdrət Ağazadə isə Proseslərə nəzarət və avtomatika üzrə istehsalat təcrübəsi keçiblər.
Təcrübə proqramının sonunda tələbələr hesabat xarakterli təqdimatla çıxış ediblər və hər biri sertifikatla təmin olunub. İstehsalat təcrübəsində ixtisaslar üzrə ilkin bacarıqlara yiyələnən tələbələr gələcək fəaliyyətlərində lazım olacaq mühüm bilik və səriştə əldə ediblər.
Səfər müddətində tələbələri müşayiət etmək məqsədilə universitetin əməkdaşları – Elmi hissənin müdiri dosent Samir Orucov və Mühəndislik fakültəsinin baş müəllimi Rasim Rəsulov İzmir şəhərinə ezam olunublar.
Kollektiv, həmçinin İzmir şəhərində yerləşən bir neçə elm, tədqiqat və innovasiya müəssisələrini ziyarət edib və müxtəlif görüşlər keçiriblər.
