Sumqayıt Dövlət Universiteti (SDU) ilə Təhsilin İnkişafı Fondu (TİF) arasında əməkdaşlıq müqaviləsi imzalanıb.
Sumqayıt24 xəbər verir ki, imzalanma mərasimi “TələbəPlus” layihəsi çərçivəsində baş tutub. Universitetin rektoru, dosent Rüfət Əzizov tərəflər arasında elmi-pedaqoji heyətin və təhsilalanların IELTS imtahanına təşviq edilməsi, Dayanıqlı İnkişaf Mərkəzinin yaradılması kimi əməkdaşlıqların uğurla davam etdirildiyini bildirib. Həmçinin layihənin tələbələr üçün geniş imtiyazlar verəcəyi qeyd olunub.
TİF-nin İdarə Heyətinin sədri Elnur Nəsibov çıxışında Fond tərəfindən həyata keçirilən layihələrdən danışıb. O bildirib ki, bir müddət öncə Təhsilin İnkişafı Fondu Kapital Bank və “Visa” beynəlxalq ödəmə texnologiyaları şirkəti arasında yeni “TələbəPlus” kartlarının istifadəyə verilməsi üçün memorandum imzalanıb. Kart vasitəsilə tələbələrin güzəşt və endirimlərdən yararlanmalarını təmin etməklə yanaşı, eyni zamanda onların sosial həyatlarına dəstək göstərmək istiqamətində həyata keçiriləcək fəaliyyətlərdən söz açılıb.
Sədr qeyd edib ki, alış-veriş mərkəzlərində və tələbələrin ən çox getdikləri iaşə obyektlərində onlara özəl güzəştlər edilməsi üçün 200-dən artıq şirkətlə razılaşma əldə olunub.
Bundan əlavə, Mədəniyyət Nazirliyi ilə əldə edilən ilkin razılaşmaya əsasən, muzeylər, qalereyalar və sərgi salonlarında tələbələr üçün xüsusi güzəştlər nəzərdə tutulur.
Layihə çərçivəsində ilkin olaraq 150 min tələbə kartının istifadəyə verilməsi planlaşdırılır. Tələbələr bütün bank əməliyyatlarını bu kart vasitəsilə rahat şəkildə yerinə yetirə biləcəklər.
Bu layihənin gələcəkdə həmçinin təhsil işçilərinə də tətbiq olunacağı planlaşdırılır.
