Sumqayıtda usta şirkət sahibinə hücum edib. Bu haqda 27 iyul tarixində Sumqayıt24 Den.az-a istinadən məlumat verir.
Hadisə “MSİ MMC” qeyri-yaşayış yerində, TIR parkında baş verib. Ərazidə fəaliyyət göstərən avtomobil sexlərinin birində rəngsaz işləyən 39 yaşlı Elton Qurbanov əvvəlcə “Gold Logistics MMC”-nin direktoru Malik Vəliyevin ofisinə gələrək onunla mübahisə edib.
Daha sonra E.Qurbanov qəfil əlindəki stulu şirkət sahibinə və yanında olan digər şəxslərə çırpıb. Nəticədə Malik Vəliyev, oğlu Əjdər Əzizli və Əliyar İxtiyarov aldıqları zərbələrdən yerə yıxılıblar.
Davaya səbəb M.Vəliyevə məxsus avtomobil sexində E. Qurbanova işləmək üçün icazənin verilməməsi olub.
Hadisə yerinə polis əməkdaşları cəlb olunublar. Araşdırma zamanı hadisəni törədən Elton Qurbanovun bir müddət əvvəl də böhtan xarakterli hərəkətlərinə görə polisə dəvət olunduğu məlum olub.
