Novxanıda fəaliyyət göstərən ictimai iaşə obyektində plandankənar yoxlama həyata keçirilib. Bu haqda 23 avqust tarixində Sumqayıt24 AQTA-ya istinadən məlumat verir.
Qida müfəttişləri “Spring Hall” MMC-yə məxsus hotelin həyətyanı sahəsində fəaliyyət göstərən mətbəxdə monitorinq aparıblar.
Yoxlama sözügedən mətbəxdə hazırlanan toyuqlu pizzanı qəbul etdikdən sonra 2-si böyük, 4-ü uşaq olmaqla 6 nəfərə qida zəhərlənməsi diaqnozunun verilməsi əsasında aparılıb.
Monitorinq zamanı dondurucuda istifadə müddəti bitmiş, eyni zamanda temperatur rejiminə əməl olunmadan saxlanılan qida məhsulları aşkarlanıb. Həmçinin qida obyektində təmizlik və dezinfeksiya işlərinin aparılmadığı, soyuducu və dondurucularda mal qonşuluğu prinsiplərinin pozulduğu müəyyən edilib. Bununla yanaşı, işçilərin gigiyenik təlimlərə cəlb edilməsinə dair sənədlər və onların ilkin və dövri tibbi müayinələrdən keçməsi ilə bağlı tibbi arayışlar yoxlamaya təqdim olunmayıb.
Aşkarlanmış nöqsanlarla əlaqədar protokol tərtib edilib. Qüsurlar aradan qaldırılanadək obyektin fəaliyyəti müvəqqəti məhdudlaşdırılıb.
