Sumqayıt Gömrük İdarəsində xarici ticarət iştirakçıları ilə görüş keçirilib. Sumqayıt24 bu haqda 1 sentyabr tarixində xəbər verir.
Tədbirin məqsədi gömrük sistemində tətbiq edilən yeniliklərlə bağlı sahibkarların məlumatlandırılması, gömrük-biznes, gömrük-vətəndaş münasibətlərində qarşılıqlı etimadın gücləndirilməsi, onların təklif və rəylərinin dinlənilməsi olub.
Görüş zamanı Dövlət Gömrük Komitəsinin apardığı təkmilləşdirilmələr, strateji hədəflər, həyata keçirilmiş və gələcək layihələr barədə ətraflı məlumat verilib.
Bundan əlavə, Sumqayıt Gömrük İdarəsi əməkdaşlarından və biznes subyektlərinin nümayəndələrindən ibarət İctimai Şuraya sahibkarlardan ibarət daha 5 nəfər üzv qəbul olunub. Bununla da üzvlərin sayı 12 nəfərə çatıb.
Sonda sahibkarların təklif və rəyləri dinlənilib, sualları ətraflı cavablandırılıb.
