Sumqayıt Apellyasiya Məhkəməsi qalmaqallı keçmiş vəkil Sevil Hacıyeva (Sevil Balasoltan qızı Hacıyeva) barəsində yeni qərar çıxarıb.
NUH.az-ın əldə verdiyi məlumata görə, Sumqayıt Apelyasiya Məhkəməsinin Cinayət Kollegiyası 8 iyul 2025-ci ildə keçirilən iclasda Xaçmaz Rayon Məhkəməsinin 7 may 2025-ci il tarixli hökmündən verilmiş apellyasiya şikayətlərinə baxıb.
İclasda təqsirləndirilən şəxs Sevil Hacıyeva və zərərçəkmiş şəxslər iştirak ediblər. Məhkəmə, Hacıyevanın Azərbaycan Respublikası Cinayət Məcəlləsinin 128-ci maddəsi ilə zərərçəkmiş şəxsə qarşı törətdiyi əmələ görə təqsirli bilinməsinə qərar verib.
Qərara əsasən, Sevil Hacıyeva 6 ay müddətinə azadlığın məhdudlaşdırılması cəzasına məhkum edilib və bu müddətdə elektron nəzarət qolbağı taxacaq. Hökmün digər hissələri dəyişdirilmədən qüvvədə saxlanılıb.
Xatırladaq ki, "Vəkillər Kollegiyası”nın İntizam Komissiyası tərəfindən aparılan araşdırmalar nəticəsində Sevil Hacıyevanın peşə fəaliyyətində pozuntular müəyyən edilmiş və 2020-ci ildə məhkəmə qərarı ilə onun vəkillik fəaliyyəti dayandırılmışdı.
