Daxili İşlər Nazirliyinin göstərişinə əsasən, “Diqqət, uşaqlar” adlı hərəkətin təhlükəsizliyi aylığı keçirilir. Sumqayıt24 bu haqda 5 oktyabr tarixində Report.az-a istinadən xəbər verir.
Baş Dövlət Yol Polisi İdarəsi (BDYPİ) və Sumqayıt Dövlət Yol Polisi Şöbəsinin əməkdaşları tərəfindən Sumqayıt şəhər 7 nömrəli məktəbində mövzuya dair tədbir təşkil olunub.
BDYPİ-nin rəsmisi, polis polkovnik-leytenantı Mübariz Ağayev çıxışında qeyd edib ki, əsas məqsəd şagirdləri yol hərəkəti təhlükəsizliyi qaydaları ilə tanış etməkdir. O, yol nişanları, işıqforlar və piyada keçidlərinin əhəmiyyətindən danışıb, nişanlardan düzgün istifadə qaydaları haqqında məlumat verib.
Abşeron-Xızı Regional Təhsil idarəsinin əməkdaşı Gülbahar Haqverdiyeva, məktəbin direktoru Nuranə Hümbətova tədbirin əhəmiyyətindən söz açıblar.
Toplantının sonunda polis əməkdaşları şagirdlərə təhlükəsizlik qaydalarını əyani şəkildə izah edib və onlara tövsiyələr veriblər.
