Sumqayıta film həsr etmiş Xalq artistinin anadan olduğu gündür.
Sumqayit24.az xəbər verir ki, söhbət Rasim Ocaqovdan gedir. Azərbaycan rejissorluq məktəbinin istedadlı nümayəndələri sırasında özünəməxsus yer tutan və bu sahənin inkişafında mühüm rol oynayan Rasim Ocaqov 22 noyabr 1933-cü ildə Şəki şəhərində anadan olub.
Görkəmli sənət adamının ilk sərbəst işi "Onun böyük ürəyi" filmi olub. 1958-ci ildə çəkilmiş film Sumqayıt metallurqlarının həyatına həsr edilib. Bu ağır peşə adamlarının ekran həyatı operatorun kamerası ilə romantik və cəzbedici bir formaya salınıb.
Rasim Ocaqov 1980-81-ci illərdə Azərbaycanın və SSRİ-nin Dövlət mükafatları laureatına, 1982-ci ildə "Azərbaycanın Xalq artisti" fəxri adına layiq görülüb. 2002-ci il iyunun 11-də Azərbaycan Respublikasının Prezidentinin fərdi təqaüdünə layiq görülüb.
R.Ocaqov 11 iyul 2006-cı ildə Bakıda dünyasını dəyişib. Görkəmli kinorejissor, Dövlət mükafatı laureatı, Xalq artisti yaşasaydı, bu gün 91 yaşını qeyd edəcəkdi.
