Sumqayıt Reabilitasiya Mərkəzi yeni layihəyə start verib. Bu haqda 2 fevral tarixində Sumqayıt24 Dövlət Tibbi-Sosial Ekspertiza və Reabilitasiya Agentliyinə istinadən məlumat verir.
“Düşüncədən ünsiyyətə” adlı layihənin əsas məqsədi inklüzivlik, bərabərlik meyarlarının artırılması, əlilliyi olan şəxslərlə münasibətin erkən yaşlarda formalaşması, sosial qayğıya ehtiyacı olan insanlara daha həssas davranışın yaranmasıdır.
Layihə çərçivəsində artıq Sumqayıt şəhəri və Saray qəsəbəsində iki məktəbdə mərkəzin psixoloqları, yoqa və müalicəvi bədən tərbiyəsi üzrə təlimatçılardan, həmçinin əlilliyi olan şəxslərdən ibarət komanda ilə görüş baş tutub.
Psixoloqların keçirdikləri qrup terapiyasında şagirdlərin imtahanqabağı streslə mübarizəsi, özgüvən hissinin artırılması, həyəcan-təşviş pozuntusunun aradan qaldırılması, idrak proseslərinin inkişafı mövzularında da təlim keçirilib.
