Dünyanın 16 nadir adamından biri Sumqayıtda yaşayır. Sumqayıt24 bu haqda 12 avqust tarixində BakuTV-yə istinadən xəbər verir.
Söhbət daxili orqanlarının yerləri dəyişik olan Hafiz Eynullayevdən gedir. Onun ürəyi sağda, qaraciyəri isə soldadır. Kişinin digər orqanları da öz yerində deyil. Bu şəxs anatomik quruluşuna görə ölkədə yeganə insandır.
Hafiz 10-cu sinifdə oxuyarkən özündəki qeyri-adiliyi öyrənib. İllər sonra müraciət etdiyi həkimlər isə ona daxili orqanlarının yerinin dəyişik olduğunu deyiblər:
“Ürəyim sağdadır, qalan hər şeyim isə solda. Solda, belə demək olarsa, “tıxacdır”. İnstitutda oxuyan vaxtlar etüd göstərirdik, etüddə süjetə uyğun olaraq əli ürəyə aparmalısan, mənim də əlim mexaniki olaraq sağa gedirdi. Müəllim soruşurdu: “Ay bala, ürək sağda olur?” Cavab verirdim ki, ürəyim sağdadır. Ya da himn oxuyanda mən əlimi sağa aparanda hamı təəccüblənirdi.
1983-cü ildə, 10-cu sinifdə oxuyanda Yardımlıda bizi növbəyə salmaq üçün hərbi komissarlığa gətirdilər və rentgendən keçdik. Bütün sinif yoldaşlarım rentgendən keçdilər, mənə çatanda isə həkim təəccüblə baxdı, dedi: “Dur o tərəfdə”. Sonra bizi gətirən müəllimə nəsə pıçıltı ilə nəsə dedi. O isə məmnə dedi ki, ürəyimin sağdadır.
Təbii ki, həmin gün xeyli düşündüm. 1995 ya 1996-cı ildə bədənimdə yüngül ağrılar hiss etdim. Gəldim həkimə ki, birdən qaraciyərdə nəsə olar. Həkim baxdı, qaraciyərimin olmadığını bildirdi.
Sonra başqa həkimləri çağırdı, məlum oldu ki, qaraciyər də yerini dəyişib. Mədə və kisə ortadan sıxılmış kisə formasındadır.
Üstündən illər keçəndən sonra uzi həkimi baxdı və məlum oldu ki, ümumiyyətlə, mədə, mədəaltı vəzi, dalaq, böyrək, hamısı 180 dərəcə öz oxu ətrafından çıxıb. Buna inversiya vəziyyəti deyirlər. Elə adamlar var, düzdür, ürəyi sağda olan insanlar çox olub, hətta böyük şairimiz Bəxtiyar Vahabzadənin də ürəyi sağda olub, amma sağda qaraciyər, solda mədə, mədəaltı vəzi, dalaq, böyrək bütün bunların inversiya formasında olması təxmini bildiyimə görə, dünya üzrə 16 nəfərdə var”.
Hafiz Eynullayev əlavə edib ki, belə insanlarda immunitet həddindən artıq güclü olur.
