Sumqayıt şəhərində elektrik skuterlərinin qadağan olunduğu bildirilir.
Sumqayit24.az-a müraciət edən sakinlərin iddiasına görə, bununla bağlı Sumqayıt Şəhər İcra Hakimiyyəti qeyri-rəsmi göstəriş verib. Onlar Bakı şəhərində skuterlərin geniş şəkildə fəaliyyət göstərdiyini, bu nəqliyyat vasitələrinin tıxacdan yayınmağa, vaxt itkisinin qarşısını almağa kömək etdiyini, Sumqayıt sakinlərinin isə bu imkandan məhrum olduğunu bildirirlər.
Sumqayit24.az-ın əməkdaşı iddianın nə doğru olub-olmadığını öyrənmək üçün İcra Hakimiyyətinin mətbuat katibi Eyvaz Qocayevlə əlaqə saxlayıb. E.Qocayev sorğuya cavab olaraq bildirib ki, şəhər mobilliyi, yol infrastrukturunun formalaşdırılması, o cümlədən velosiped və kiçik elektrikli nəqliyyat vasitələri üçün hərəkət mühitinin təşkili aidiyyəti qurumlar tərəfindən həyata keçirilir, yol hərəkətinin təhlükəsizliyi və qaydalara riayət olunmasına isə müvafiq nəzarət mexanizmləri tətbiq olunur:
"Bu günədək Sumqayıt Şəhər İcra Hakimiyyətinə elektrikli skuterlərin istifadəsinin qadağan olunması ilə bağlı rəsmi müraciət və ya bildiriş daxil olmayıb. Eyni zamanda, şəhər ərazisində, o cümlədən Sumqayıt bulvarında elektrikli skuterlər üçün bir neçə nöqtədə dayanacaq yerlərinin yaradılması bu nəqliyyat vasitələrinin şəhər mobilliyinin bir hissəsi kimi nəzərdə tutulduğunu göstərir.
Qeyd edirik ki, elektrikli skuterlər və digər kiçik nəqliyyat vasitələri mövcud yol hərəkəti qaydalarına uyğun şəkildə istifadə edilməlidir. Belə nəqliyyat vasitələri üçün nəzərdə tutulmuş zolaqlar olduqda onlardan istifadə olunmalı, səkilərdə hərəkətə yol verilməməli, piyadaların və digər hərəkət iştirakçılarının təhlükəsizliyinə xələl gətirilməməlidir. Qayda pozuntuları aşkar edildiyi hallarda qanunvericiliyə uyğun tədbirlər görülür.
Sumqayıt Şəhər İcra Hakimiyyəti şəhərdə ekoloji cəhətdən təmiz və alternativ nəqliyyat vasitələrinin inkişafını, eyni zamanda təhlükəsizlik, intizam və qarşılıqlı məsuliyyət prinsiplərinə əməl olunmasını vacib hesab edir və bu sahədə aidiyyəti qurumlarla əməkdaşlığı davam etdirir".
