Sumqayıt Dövlət Dram Teatrında mövsümün yeni “Yuxu” uşaq tamaşasına daxili baxış keçirilib. Sumqayıt24 bu haqda 11 oktyabr tarixində xəbər verir.
Nizami Mirzəyevin tərcüməsində, rejissor Fuad Kazımovun səhnələşdirməsi və quruluşunda dünya xalqlarının nağıl qəhrəmanlarını ehtiva edən tamaşa bədii şuraya təqdim olunub. Teatrın direktor müavini, müvəqqəti rəhbər vəzifəsini icra edən Əməkdar artist Vidadi Məmmədov sözü bədii şura üzvlərinə və digər truppa üzvlərinə verib.
Çıxışlarda uşaqlar üçün bu kimi tamaşaların faydalı olduğu, səhnə əsərinə yeni düşüncə ilə yanaşmanın uğurlu tamaşanın ərsəyə gəlməsinə rəvac verdiyi vurğulanıb.
Sonda teatrın baş rejissoru, Xalq artisti Firudin Məhərrəmov tamaşa ilə bağlı fikirlərini bölüşüb.
Yaxın günlərdə premyerası olacaq tamaşanın quruluşçu rəssamı Arif Müzəffərov, musiqi tərtibatçısı Telman Qəniyevdir. Rollarda Əməkdar artistlər Növrəstə Həşimova, Fəranə Musayeva, aktyorlar Dağlar Rüstəmov, Vəfa Qurbanova, Məryəm Hüseynova, Kamran Muradlı, Fizuli Qərənizadə çıxış edirlər.
